मान्सून अपडेट : पुढील 3 दिवस राज्यातील “या” जिल्ह्यात पावसाची शक्यता

नवी दिल्ली : मान्सूनच्या प्रवेशापूर्वी केरळमध्ये मान्सूनपूर्व पावसाच्या हालचाली सुरू आहेत. IMD नुसार, वेस्टर्न डिस्टर्बन्सच्या प्रभावामुळे उत्तर भारतातील राज्यांमध्येही हवामान बदलले आहे. गेल्या काही दिवसांपासून अनेक राज्यांमध्ये हलका पाऊस आणि गडगडाटामुळे कमाल तापमानात घसरण होत आहे.

दरम्यान, भारतीय हवामानशास्त्र विभागाने (IMD) यावर्षी मान्सूनच्या पावसाचा अंदाज व्यक्त केला आहे. IMD मुंबईचे प्रमुख जयंत सरकार यांनी बुधवारी सांगितले की, यावर्षी ९९ टक्के पाऊस अपेक्षित आहे.

केरळमध्ये २७ मे रोजी मान्सून दाखल होणार आहे

IMD नुसार केरळमध्ये 27 मे रोजी मान्सून सुरू होण्याची शक्यता आहे. येत्या पाच दिवसांत कोकण आणि गोव्यात हलका ते मध्यम पाऊस पडण्याची शक्यता आहे. राज्याच्या इतर भागातही हलका पाऊस पडेल.

शुक्रवारपासून पुढील तीन दिवस मच्छिमारांनी अरबी समुद्रात जाऊ नये, असा सल्ला हवामान खात्याने दिला आहे. IMD ने म्हटले आहे की 27 ते 29 मे 2022 पर्यंत 40 ते 50 किमी प्रतितास वेगाने वाहणारे जोरदार वारे 60 किमी प्रतितास वेगाने वाहण्याची शक्यता आहे.

महाराष्ट्रात काय असणार पावसाची परिस्थिती ?

राज्यात पुढील तीन दिवस मेघगर्जना व विजांच्या कडकडाटासह वादळी वारे वाहण्याची, तर काही ठिकाणी पावसाची शक्यता व्यक्त करण्यात आली आहे. हवामान विभागाच्या अंदाजानुसार आता जूनच्या पहिल्या आठवडय़ात र्नैऋत्य मोसमी वारे केरळमध्ये दाखल होतील.

त्यानंतर कोकणमार्गे महाराष्ट्र आणि मुंबई परिसरात हे वारे पोहोचतील. बुधवारी (२५ मे) विदर्भातील नागपूर, वर्धा, अमरावती, अकोला, यवतमाळ, बुलढाणा, वाशिम जिल्ह्यात तुरळक ठिकाणी मेघगर्जना व विजांच्या कडकडाटासह वादळी वारे वाहण्याची शक्यता आहे.

कोकण आणि विदर्भाच्या काही भागांत पुढील चार दिवस मेघगर्जना आणि विजांच्या कडकडाटासह पाऊस पडणार असल्याचा अंदाज हवामानशास्त्र विभागाने वर्तविला आहे.

राजस्थानच्या उत्तर पूर्व भागापासून ते उत्तर पूर्व अरबी समुद्रापर्यंत कमी दाबाचा पट्टा तयार झाला आहे. तसेच उत्तर पूर्व राजस्थान ते बंगालच्या उपसागरापर्यंत उत्तर प्रदेश पार करून हवेच्या वरच्या भागात चक्रीय स्थिती आहे.

यामुळे उत्तर भारतातील बहुतांश राज्यांत पावसाने थैमान घातले आहे. राज्यातील कोकण, विदर्भ आणि कोल्हापूरसह मध्य महाराष्ट्रातील काही भागांत जोरदार वादळी वारे, मेघगर्जना आणि विजांच्या कडकडाटात पुढील चार दिवस पाऊस पडणार आहे.

बंगालच्या उपसागरासह अंदमानला दाखल झालेला मान्सून गेल्या तीन दिवसांपासून अनुकूल स्थितीच्या अभावामुळे अजूनही पुढे सरकू शकलेला नाही. दरम्यान, कोल्हापूर, कोकणसह राज्यातील काही भागांत चार दिवस मुसळधार पावसाचा अंदाज वर्तविण्यात आला आहे.

‘या’ जिल्ह्यांत पाऊस

कोल्हापूर, सांगली, पालघर, मुंबई, ठाणे, रायगड, रत्नागिरी, सिंधुदुर्ग, धुळे, नंदुरबार, जळगाव, यवतमाळ, अहमदनगर या जिल्ह्यांत पाऊस हजेरी लावणार असल्याचा अंदाज हवामानशास्त्र विभागाने वर्तविला आहे.

गुरुवारी (२६ मे) विदर्भातील गोंदिया जिल्हा सोडून उर्वरित सर्वच जिल्ह्यात तुरळक ठिकाणी मेघगर्जना व विजांच्या कडकडाटासह वादळी वारे वाहण्याची शक्यता आहे, तर शुक्रवारी (२७ मे) विदर्भातील भंडारा, गोंदिया व गडचिरोली जिल्ह्यात तुरळक ठिकाणी मेघगर्जना व विजांच्या कडकडाटासह वारे वाहण्याची शक्यता हवामान विभागाकडून व्यक्त करण्यात आली आहे.

मच्छिमारांनी समुद्रात न जाण्याचा सल्ला दिला

IMD ने बुधवारी सांगितले की मच्छिमारांना 27 ते 29 मे 2022 पर्यंत उत्तर गुजरात किनारपट्टीवरील समुद्रात जाऊ नये असा सल्ला देण्यात आला आहे. कच्छ, जामनगर, पोरबंदर आणि देवभूमी द्वारका जिल्ह्यांतील अरबी समुद्र किनाऱ्यावर काम करणाऱ्या मच्छिमारांसाठी मार्गदर्शक तत्त्वे जारी करण्यात आली आहेत.

हवामान संस्थेने सांगितले की, सौराष्ट्र विभागातील राजकोट जिल्ह्यातील राजकोट तालुक्यात मंगळवारी 6 मिमी अवकाळी पाऊस झाला. मात्र, येत्या चार-पाच दिवसांत या भागातील कमाल तापमानात मोठा बदल होण्याची शक्यता नाही.

गुजरातमध्ये पावसाची शक्यता

IMD ने दक्षिण गुजरातमधील काही जिल्ह्यांमध्ये काही ठिकाणी हलका पाऊस आणि मेघगर्जनेसह पावसाचा अंदाज वर्तवला आहे. याशिवाय आज राष्ट्रीय राजधानी दिल्लीत ढगाळ आकाशासह हलक्या पावसाची शक्यता आहे.

गेल्या दोन दिवसांत, मुसळधार पाऊस आणि गडगडाटानंतर दिल्ली-एनसीआरमध्ये किमान तापमानात लक्षणीय घट झाली आहे. 28 आणि 29 मे रोजी उत्तराखंड, पंजाब, हरियाणा, चंदीगड, दिल्ली, उत्तर प्रदेश आणि राजस्थानमध्ये पावसाची शक्यता आहे.